कसाबला फाशी देण्याची करकरेंच्या पत्नीची मागणी

मुंबईवर हल्ला करणा-या मोहम्मद अजमल कसाब या पाकिस्तानी दहशतवाद्याला फाशी देण्यात यावी अशी मागणी शहीद हेमंत करकरे यांच्या पत्नीने केली आहे. कसाबच्या केसची सुनावणी लवकरात लवकर करण्यात यावी असेही त्या म्हणाल्या.

२६ नोव्हेंबरच्या रात्री झालेल्याहल्ल्यात दहशतवाद विरोधी पथकाचे प्रमुख हेमंत करकरे शहीद झाले. त्यांच्या निधनानंतर मिडियाला करकरे कुटुंबाने मुलाखत दिली होती. त्यावेळी करकरे यांच्या दोन पैकी एका मुलीने कसाबला सुधारण्याची संधी द्यावी अशी मागणी केल्याचे प्रसिद्ध झाले होते. त्यावर लगेच प्रतिक्रिया देणे करकरे कुटुंबातील अन्य सदस्यांनी टाळले. त्यामुळे करकरे यांच्या पत्नी आणि मुलींची कसाबला माफ करण्यात यावे अशी भूमिका असल्याचा सगळ्यांचा गैरसमज झाला होता. मात्र करकरे यांच्या पत्नीने मुख्यमंत्री अशोक चव्हाण यांना पत्र लिहून गैरसमज दूर केला आहे.

माझ्या मुलीचे विधान हे तिचे वैयक्तिक मत आहे, करकरे यांची पत्नी या नात्याने कसाबला फाशी देण्यात यावी असेच मला वाटत असल्याचे त्यांनी सांगितले.